Նախկին ոստիկանապետ Վալերի Օսիպյանն արձագանքել է իր նախկին գործընկեր Վլադիմիր Գասպարյանի կողմից հնչեցրած դավաճանության մեղադրանքին։ Օսիպյանը Irakanum.am-ի հետ զրույցում Գասպարյանի հայտարարություններն անվանել է «տղամարդուն ոչ վայել բամբասանք»։
Վլադիմիր Գասպարյանը հայտարարել էր, որ Օսիպյանը դավաճանել է ոստիկանական համակարգին։ Նրա խոսքով՝ Օսիպյանը դավաճանել է համակարգին՝ սկսած 2016 թվականին «Սասնա ծռեր» խմբի կողմից ոստիկանության գնդի գրավման շուրջ տեղի ունեցած իրադարձություններից։
«Ինչ վերաբերում է դավաճանությանը, ապա պարոն Գասպարյան ինքներդ ձեզ նայեք ու ձեր շրջապատին»,- ասել է Օսիպյանը։ Ըստ հրապարակման՝ մեկնաբանելով 2016 թվականին դավաճանության մեջ Գասպարյանի մեղադրանքը՝ Օսիպյանը նրան խորհուրդ է տվել թարմացնել հիշողությունը, դիմելով ԱԱԾ-ին, «գուցե տրամադրեն այդ օրերից որոշ ձայնագրություններ»։
Օսիպյանը մեկնաբանել է նաև Գասպարյանի գործողությունները 2018 թվականի գարնանը տեղի ունեցած բողոքի ցույցերի ժամանակ, որոնք հանգեցրին իշխանափոխության։ «Պարոն Գասպարյան, երևի մոռացել եք, որ 2018 թվականին ասում էի՝ մի բան ձեռնարկենք, ինքներդ էիք ասում հանգիստ եղեք, այսպես ասած ամեն ինչ կոնտրոլի տակ է, իսկ սա դավաճանություն չէ՞։ Այսքանը կասեմ ու կշարունակեմ լռել, որ պարոն Գասպարյան, դուք հանգիստ քնեք»,- նշել է նախկին ոստիկանապետը։
Վալերի Օսիպյանը ոստիկանության Երևանի վարչության պետի տեղակալի պաշտոնը զբաղեցրել է 2012 թվականի սեպտեմբերից մինչև 2018 թվականի մայիսը։ 2018 թվականի մայիսին Հայաստանում տեղի ունեցած իշխանափոխությունից հետո նա նշանակվել է Հայաստանի ոստիկանապետի պաշտոնում։ 2019 թվականի սեպտեմբերին Օսիպյանն ազատվել է այս պաշտոնից։
