ԶԼՄ-ն հայտնում է «Զվարթնոց»-ից ռուս սահմանապահներին հեռացնելու մտադրության մասին

Երևանի «Զվարթնոց» միջազգային օդանավակայանից ռուս սահմանապահները հեռացվելու են, հայտնում է Factor.am-ը՝ հղում անելով ՀՀ բարձրաստիճան աղբյուրի։

Նշվում է, որ այս գործընթացը տեղի է ունենալու մոտ ժամանակներում։ «Պաշտոնյան չի հստակեցնում, թե նման որոշումն ինչով է պայմանավորված, սակայն, վստահեցնում է, որ քաղաքական որոշում կա»,- նշում է կայքը։

Ռուս սահմանապահների տեղակայումը «Զվարթնոց» օդանավակայանում չի կարգավորվում միջկառավարական պայմանագրով։ Factor.am-ին հայտնի է դարձել, որ ռուս սահմանապահներն օդանավակայանում ծառայություն են իրականացնում ՀՀ ԱԱԾ-ի և ՌԴ ԱԴԾ-ի սահմանապահ զորքերի հրամանատարների միջև ստորագրված փաստաթղթով։

Հայաստանը և Ռուսաստանը 1992 թվականին ստորագրել են պայմանագիր, որով կարգավորվում է ՀՀ տարածքում գտնվող ՌԴ սահմանապահ զորքերի կարգավիճակն ու գործունեությունը։ Այս պայմանագրում, սակայն, օդանավակայանում ծառայություն իրականացնելու վերաբերյալ կետ չկա։