Ամերիկյան The National Interest ամսագիրը Հայաստանն անվանել է մեկուսացված ժողովրդավարության երկիր և կոչ է արել ԱՄՆ-ին աջակցել Հայաստանի իշխանություններին՝ ադրբեջանական նոր ագրեսիայի սպառնալիքի պայմաններում ռազմաքաղաքական ճգնաժամի հաղթահարման գործում:
«Առանց Միացյալ Նահանգների և այլ ժողովրդավարական երկրների աջակցության Հայաստանի ժողովրդավարական ձեռքբերումները կարող են վտանգի տակ լինել, և կառավարությունը կարող է ավելի շատ ներքաշվել Կրեմլի ավտոկրատական ուղեծիր»,- գրում է ամսագիրը: Հրատարակությունը կարծում է, որ ԱՄՆ-ի աջակցությունը Հայաստանին պետք է լինի ինչպես մարդասիրական օգնության, այնպես էլ երկրում ժողովրդավարական ինստիտուտների զարգացմանն աջակցելու տեսքով։ Այդ նպատակով ամսագիրը խորհուրդ է տվել օգնություն ցուցաբերել Լեռնային Ղարաբաղից արցախցիների տեղահանության ժամանակ տեղի ունեցած մարդու իրավունքների խախտումների փաստագրման հարցում, քանի որ այդ գրառումներն օգտակար կլինեն Ադրբեջանի դեմ դատական հայցերի ժամանակ:
Հեղինակ Մարկ Դիտցենի կարծիքով՝ Ղարաբաղում Բաքվի ագրեսիայից հետո Արևմուտքի լռությունը կհանգեցնի այլ տարածաշրջաններում նման սցենարների կրկնությանը։ «Եթե Լեռնային Ղարաբաղի բռնազավթումը համարժեք գլոբալ արձագանքի չարժանանա, նախագահ Ալիևը և նրա գործընկեր միապետները կխրախուսվեն շարունակել ուժ կիրառել քաղաքական նպատակներին հասնելու համար»,- բացատրել է նա: Դիտցենն ընդգծել է Ադրբեջանի իշխանությունների դեմ պատժամիջոցների կիրառման և ԱՄՆ-ից ռազմական օգնության դադարեցման կարևորությունը։ Նա կոչ է արել ԱՄՆ-ին և ԵՄ-ին բարձր մակարդակի բանագնացներ ուղարկել Անկարա՝ Թուրքիային ներգրավելու Հայաստանի և Ադրբեջանի միջև առկա խնդիրները երկխոսության միջոցով լուծելու գործին։
Ըստ հրապարակման՝ Արևմուտքը պետք է «հետևի երկարաժամկետ ռազմավարությանը, որը Հայաստանին վերակողմնորոշում է Ռուսաստանից դեպի ժողովրդավարությունների համայնք» և խորացնելու համագործակցությունը Հայաստանի հետ անվտանգության ոլորտում։ «Ռուսական զորքերը շուտով կլքեն Լեռնային Ղարաբաղը, սակայն նրանց ներկայությունը Հայաստանում կշարունակվի այնքան ժամանակ, քանի դեռ Երևանը չունի անվտանգության հուսալի այլընտրանք»,- մանրամասնել է նա։
Հոկտեմբերի 7-ին Ադրբեջանի նախագահ Իլհամ Ալիևը Եվրոպական խորհրդի ղեկավար Շառլ Միշելին ասել էր, որ ութ անկլավներ «դեռևս գտնվում են Հայաստանի օկուպացիայի տակ» և ընդգծել դրանց «ապաօկուպացիայի» կարևորությունը։ Հոկտեմբերի 9-ին ԵՄ-ում Հայաստանի դեսպան Տիգրան Բալայանը հայտարարել էր Բաքվի կողմից «մի քանի շաբաթվա ընթացքում» նոր ռազմական ագրեսիայի սպառնալիքի մասին։ Հոկտեմբերի 14-ին Politico-ն հաղորդել էր ԱՄՆ պետքարտուղար Էնթոնի Բլինքենի նախազգուշացման մասին օրենսդիրներին՝ առաջիկա շաբաթների ընթացքում Հայաստանի հարավ ադրբեջանական հնարավոր ներխուժման մասին: Հոկտեմբերի 23-ին Financial Times-ը գրել էր նաև Հայաստան ադրբեջանական ներխուժման մտավախությունների խոր արմատների մասին։
Հոկտեմբերի 27-ին ՀՀ ԱԺ նախագահ Ալեն Սիմոնյանը հայտարարել էր, որ Հայաստանը խաղաղության համար հնարավոր բոլոր գները վճարել է և չի կարծում, թե ավել գին կվճարի:
