Անկախ նախկինում զբաղեցրած պաշտոնից, անկախ առաջիկա ընտրությունների մասին քննարկումներից ինձ համար մեծ պատիվ է լինել իմ ծննդավայր Երևանի փոխքաղաքապետ, ծառայել քաղաքին ու երևանցիներին: Այս մասին Երևանի քաղաքապետարանի ավագանու արտահերթ նիստի իր ելույթում ասաց նախկին փոխվարչապետ Տիգրան Ավինյանը:
Ավինյանն իր ելույթում անդրադարձավ մայրաքաղաքի բազմաթիվ խնդիրներին՝ խաղահրապարակների բացակայություն, հաշմանդամների տեղաշարժի անհարմարություն, տրանսպորտային խնդիր՝ նշելով, որ դեռևս 2018 թվականից Երևանի քաղաքապետարանը ջանքեր է ներդրել, շատ խնդիրներ արդեն լուծվել են։
Ըստ թեկնածուի՝ Երևանը պետք է լինի քաղաք՝ մարդկանց համար: Դրան հասնելու համար հանրային շահի գերակայություն պետք է տիրի անհատական շահի նկատմամբ։
«Չի կարող մեկի անհատական շահը՝ իր շենքի բակում ավտոտնակի կառուցումը, ավելի կարևոր լինել, քան երեխաների խաղը բարեկարգ խաղահրապարակում։ Չի կարող մեկի շինարարությունն ավելի կարևոր լինել, քան մեր քաղաքի ճարտարապետական տեսքը։ Մեր կողմից առաջարկվող լուծումները պետք է հիմնված լինեն հանրային և ոչ անհատական շահի սպասարկման վրա։ Քաղաքի հաշվին ընկերներին, բարեկամներին և ծանոթներին լավություններ անել պետք չէ»,- ասաց թեկնածուն։
Մարդկանց համար քաղաք կառուցել նշանակում է ապահովել այնպիսի միջավայր, որտեղ բոլորն ունեն հավասար հնարավորություններ: Անկախ նրանից՝ թե որտեղ ենք մենք ապրում՝ Շենգավիթում, Կենտրոնում, Նուբարաշենում, թե Մասիվում, կարծում է Ավինյանը:
