«Տաշիր» ընկերությունների խմբի ղեկավար Սամվել Կարապետյանը դատական հայց է ներկայացրել հասարակական գործիչ Ազատ Արշակյանի դեմ՝ պահանջելով նրան պարտավորեցնել հերքել զրպարտչական հայտարարությունները և վճարել փոխհատուցում: Հայցը հրապարակվել է Datalex.am դատական տեղեկատվության կայքում։
Արշակյանը հուլիսի 12-ին լրագրող Նարեկ Կիրակոսյանին տված հարցազրույցում, ինչպես նաև հուլիսի 22-ին 1in.am-ի «Բաց հարթակ» հաղորդման ժամանակ հայտարարել էր, որ Կարապետյանը «գործում է Հայաստանի դեմ, նրա «մշակույթը» թալան է, նա հարկեր չի վճարում», ինչպես նաև նմանատիպ այլ հայտարարություններ էր արել։
Դատարանի որոշման ուժի մեջ մտնելուց հետո Արշակյանը պետք է հինգ աշխատանքային օրվա ընթացքում հրապարակի տեսագրություն, որում նա նշում է՝ այս տեղեկատվությունը զրպարտչական, կեղծ և անհիմն է, ինչպես նաև ներողություն խնդրի։
Կարապետյանը նաև պահանջում է, որ Արշակյանը վճարի 6 միլիոն դրամ փոխհատուցում զրպարտության համար, ինչպես նաև դատական ծախսերի փոխհատուցում, ներառյալ՝ պետական տուրքերը և փաստաբանի ողջամիտ վարձատրությունը։
Հուլիսի սկզբին Կարապետյանը զրպարտության հայց էր ներկայացրել «Քաղաքացիական պայմանագիր» խմբակցության պատգամավորներ Արսեն Թորոսյանի և Հայկ Կոնջորյանի, ինչպես նաև բլոգեր Ռոման Բաղդասարյանի դեմ։ Ավելի ուշ «Տաշիր» բարեգործական հիմնադրամը դատական հայց էր ներկայացրել Երևանի քաղաքապետարանի դեմ՝ Կարապետյանին ազատ արձակելու կոչ անող պաստառները ապամոնտաժելու համար։
