ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության վարչական շենքից առանձնապես խոշոր չափերով գումար հափշտակելու դեպքի առթիվ քրեական վարույթ է նախաձեռնվել, հայտնում է Հակակոռուպցիոն կոմիտեն։
Նշվում է, որ ձերբակալվել է մեկ անձ։
Վարույթը նախաձեռնվել է ՀՀ քրեական օրենսգրքի 446-րդ հոդվածի 2-րդ մասի (պաշտոնեական անփութությունը, առավելագույն պատիժը 5 տարվա ազատազրկում) և ՀՀ քրեական օրենսգրքի 254-րդ հոդվածի 3-րդ մասի 2-րդ և 4-րդ կետերի (խոշոր չափերով գողությունը, առավելագույն պատիժը՝ 5 տարվա ազատազրկում) հատկանիշներով։
Նշվում է, որ հանցագործությունը բացահայտելու ուղղությամբ ձեռնարկվել և իրականացվում են լայնածավալ օպերատիվ-հետախուզական և ապացուցողական գործողություններ։
Այսօր ավելի վաղ «Փաստինֆո»-ն հայտնել էր, որ ՔԿ տնտեսական հանցագործությունների և մաքսանենգությունների քննության գլխավոր վարչության շենքից հափշտակվել է որպես իրեղեն ապացույց պահվող 590 000 դոլար։ Ըստ թերթի՝ գործով ձերբակալվել էր գլխավոր վարչության 5-րդ վարչության պետը։
