Թարմացում
12:46
ՀՀ գլխավոր դատախազությունից Armenia Today-ին հայտնել են, որ դատական ակտն ստանալուց հետո վերաքննիչ բողոք են ներկայացնելու։
11:45
Առաջին ատյանի ընդհանուր իրավասության դատարանը մայիսի 14-ին դատավոր Արամայիս Ասատրյանի նախագահությամբ կայացած նիստում 3 տարի, 6 ամիս ժամկետով ազատազրկման է ենթարկել ՀՀ արտաքին գործերի նախարար Արարատ Միրզոյանին ծեծի գործով ամբաստանյալ Արա Բադոյանին, Armenia Today-ին հայտնել է քրեական դատարանների խոսնակ Լիանա Ռաֆայելյանը։
Նա հստակեցրել է, որ 3 տարի, 6 ամիս ժամկետին հաշվակցվել է Բադոյանի՝ անազատության մեջ գտնված 1 տարի, 6 ամիս, 7 օրը։
«Վերջնական պատիժ է սահմանվել 1 տարի, 11 ամիս, 23 օրը, Քրեական հին՝ 2003 թվականին ուժի մեջ մտած օրենսգքրի 225 հոդվածի 2-րդ մասով (զանգվածային անկարգությունների ժամանակ դրանց մասնակցի կողմից բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը-խմբ․)»,- հավելել է Ռաֆայելյանը։
Խոսնակն, անդրադառնալով ԶԼՄ-ներում տարածված տեղեկությանը, թե դատարան Բադոյանի համար շտապօգնություն են կանչել, նշել է, որ նիստի ընթացքում որևէ միջադեպ չի գրանցվել։
2020-ի 44-օրյա պատերազմից հետո՝ նոյեմբերի 10-ի գիշերը, որին նախորդել էր Հայաստանի, Ռուսաստանի և Ադրբեջանի ղեկավարների միջև կրակի դադարեցման փաստաթղթի ստորագրումը, Երևանում զանգվածային անկարգություններ էին տեղի ունեցել, ծեծի էր ենթարկվել այդ ժամանակ ԱԺ նախագահի պաշտոնն զբաղեցնող Միրզոյանը։ 2020-ի հունվարին ԱԱԾ-ն հայտնել էր, որ կալանավորվել են Միրզոյանի նկատմամբ բռնություն գործադրած և վարչապետ Նիկոլ Փաշինյանին հատկացված կեցավայրից հափշտակություն կատարած անձինք։ Բադոյանին մեղադրանք էր առաջադրվել ՀՀ կառավարության շենքի մոտ ամբոխ հավաքելու և զանգվածային անկարգություններ կատարելու, Միրզոյանին հարվածներ հասցնելու համար: Բադոյանին 2023-ի օգոստոսին ազատ էին արձակել, 2023-ի նոյեմբերին կրկին կալանավորել էին։
