Բարձրագույն դատական խորհորդի դատավորների էթիկայի և կարգապահական հարցերով հանձնաժողովը Երևանի ընդհանուր իրավասության քաղաքացիական դատարանի դատավոր Աշոտ Հովհաննիսյանի նկատմամբ նրա կողմից հայցերը հետ վերադարձնելու առնչությամբ կարգապահական վարույթ է հարուցել, գրում է «Հրապարակ» օրաթերթը՝ հղում անելով իր աղբյուրներին։
Թերթի տեղեկություններով՝ վարույթը հարուցվել է ՀՀ ԱՆ «Հոգեկան առողջության պահպանման ազգային կենտրոն» ՓԲԸ տնօրեն Սերգեյ Խաչատրյանի հաղորդման հիման վրա, սակայն հայտնի չէ, թե հստակ ինչ ենթադրյալ խախտում է վերագրվում դատավորին։
Թերթի տեղեկություններով՝ Հովհաննիսյանը հանրային ուշադրության կենտրոնում է հայտնվել 2023-ին, երբ 2021 և 2022 թվականների տարեկան հայտարարագրերում խոշոր չափի կանխիկ գումար էր նշել։
«Նա 2022-ի տարեկան հայտարարագրի համաձայն՝ ունեցել է մոտ 26 մլն դրամ եկամուտ, սակայն բանկային հաշիվներում՝ 685 000 դրամ։ Կանխիկ դրամական միջոցները կազմել են 106 000 դոլար, 21 մլն դրամ և 16 000 եվրո: 2021-ի հայտարարագրում արտացոլվել է գրեթե նույն կանխիկ գումարը՝ 100 500 դոլար, 20 մլն 300 000 դրամ և 15 000 100 եվրո: Մինչդեռ բանկային հաշիվներում պահվող գումարը կազմել է մոտ 187 000 դրամ և 4000 դոլար»,- ասված է հրապարակման մեջ։
