Վերաքննիչ քրեական դատարանը վերացրել է Երևանի «Հանրապետության» հրապարակում ադրբեջաներեն «Ղարաբաղ» երգող օտարերկրացիների մասնակցությամբ տեսանյութը տարածած Ղարիբ Բաբայանի նկատմամբ ընտրված սահմանափակումները, հայտնել են նրա փաստաբանները։
Ըստ Ղարիբյանի փաստաբանական թիմի՝ դատարանը բավարարել է պաշտպանական կողմի բողոքը Բաբայանին առնչվող վարույթով՝ արձանագրելով հիմնավոր կասկածի բացակայությունը։
Բաբայանը մեղադրվում է ՀՀ քրեական օրենսգրքի 329 հոդվածի 2-րդ մասով նախատեսված արարք կատարելու մեջ (ատելություն հրահրող հրապարակային խոսք, առավելագույն պատիժը՝ 4 տարվա ազատազրկում)։
Հունվարի 30-ին Ֆեյսբուքում տարածվել էր Երևանում օտարերկրյա քաղաքացիների մասնակցությամբ երգելու տեսանյութ։ Հունվարի 31-ին ԱԱԾ-ն հայտնել էր, որ հրապարակում երգողներն Իրանի քաղաքացիներ են։ Փետրվարի 1-ին ԱԱԾ-ն Իրանի քաղաքացիների՝ տեսանյութը հրապարակած ՀԿ ղեկավարի նկատմամբ գործ հարուցելու մասին հաղորդում էր ներկայացրել ՔԿ։ Ավելի ուշ ՔԿ-ն հայտնել էր, որ ձերբակալվել է տեսանյութը տարածող արցախցի Ղարիբ Բաբայանը։
Ըստ ՔԿ-ի՝ Բաբայանին ձերբակալել էին «Ղարաբաղ, ջան Ղարաբաղ» երգն ադրբեջաներենով երգելու տեսանյութը հրապարակելու և այդ միջոցով «ՀՀ իշխանությունների ու ՀՀ ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված հրապարակային խոսք» տարածելու մեղադրանքով։ Փետրվարի 2-ին Բաբայանին դատարանի դահլիճից ազատ էին արձակել՝ կիրառելով վարչական հսկողություն խափանման միջոցը, արգելելով հանդես գալ հրապարակային խոսքով։
