Շիրակի մարզի Աշոցք համայնքի բազմաթիվ բնակավայրերում բրուցելոզով վարակված անասուններ կան, վարակը դուրս է եկել վերահսկողությունից, գրել է ԱԺ «Հայաստան» խմբակցության պատգամավոր Մհեր Մելքոնյանը։
Պատգամավորը, որն այցելել է Աշոցք համայնքի Մուսայելյան բնակավայր, տեղեկացրել է, որ հիվանդությունը շարունակվում է տարածվել։ Նա շտապ արձագանք է պահանջել պետական կառույցների կողմից, որոնք, նրա խոսքով, լուռ են։
«Պետական մարմինների կողմից ոչ մի լուրջ գործողություն չկա։ Գյուղացիները կորցնում են ապրուստի աղբյուրը՝ առանց պետական աջակցության։ Ես պահանջում եմ համապարփակ ստուգումներ իրականացնել Շիրակի մարզում, փոխհատուցել ֆերմերներին հասցված վնասի դիմաց, ինչպես նաև իրազեկման համապետական արշավ՝ բրուցելոզի կանխարգելման համար»,- գրել է Մելքոնյանը՝ նշելով հիվանության տարածման վտանգի մասին։
Մայիսի 20-ին Սննդամթերքի անվտանգության տեսչական մարմնից հայտնել էին, որ Գեղարքունիքի Չկալովկա գյուղում արձանագրվել են բրուցելոզի դեպքեր։ ՍԱՏՄ-ից հավելել էին, որ իրավիճակը վերահսկվում է։
