Վարչապետ Նիկոլ Փաշինյանը ասուլիսում հայտարարել է, որ ընթանում են բանակցություններ՝ Սյունիքի տարածքով Ադրբեջանը Նախիջևանին կապող 43 կմ երկարությամբ ճանապարհի բացման շուրջ։ Նրա խոսքով՝ քննարկվում է նաև տարբերակ, որի համաձայն՝ այս ճանապարհը կարող է անցնել երրորդ կողմի վերահսկողությանը։
Փաշինյանի խոսքով՝ «գլոբալ խաղացողները» հետաքրքրված են «Խաղաղության խաչմերուկ» նախագծով, որի շրջանակում ՀՀ կառավարությունը ներկայացրել է իր առաջարկը տարածաշրջանի տրանսպորտային հանգույցների, լոգիստիկ կապերի և ենթակառուցվածքների ապաշրջափակման ու զարգացման վերաբերյալ։
Նույն ասուլիսում Փաշինյանը Armenia Today-ին հաստատել է, որ նշված «գլոբալ խաղացողների» մեջ հիմնականում նկատի ունեն ամերիկյան կողմի առաջարկը՝ Սյունիքի տարածքով անցնող ճանապարհի կառավայման և վերահսկման հետ կապված։
Վաշինգտոնի առաջարկի մասին, որը նախատեսում է 100 տարի ժամկետով վերահսկողության տակ վերցնել Հայաստանի և Ադրբեջանի միջև գտնվող տրանսպորտային միջանցքը, երկու օր առաջ հայտարարել է Թուրքիայում ԱՄՆ դեսպան Թոմ Բարաքը։
Armenia Today-ի նկարահանող խումբը քաղաքացիներից հետաքրքրվել է, թե ի՞նչ կարծիք ունեն ԱՄՆ-ի այս առաջարկի մասին և արդյոք նրանք կողմ են, որ միջանցքը կառավարվի այլ երկրի կողմից։
Քաղաքացիների մեծամասնությունը դեմ չէ արտաքին վերահսկողությանը։ Նրանցից մի քանիսն ընդգծել են, որ կողմ են՝ միայն իրապես անվտանգությունն ապահովելու և ՀՀ ինքնիշխանությունը չվտանգելու դեպքում։ Ոմանք էլ կտրանապես դեմ էին ԱՄՆ-ի ներկայությաը տարածաշրջանում։
«Եթե մենք չենք կարողանում պահել, թող ուրիշը գա, պահի»,- նշեց քաղաքացիներից մեկը։
Մի կին էլ հավելեց՝ «եթե վերահսկողության դեպքում սահմանը մոտակա 100 տարին անվտանգ կլինի, դեմ չէ»։
Նրանցից ոմանք էլ խուսափել են հստակ դիրքորոշում հայտնել՝ հաշվի առնելով, որ վերջնական որոշման մասին ԱՄՆ-ն դեռ հստակ չի հայտարարել։
«Տեսնենք հաստատում է, թե ոչ, նոր կարծի կհայտնենք։ Եթե որպես օպերատոր լինի, համաձայն ենք, բայց եթե մեր ինքնիշխանության հաշվին՝ ոչ»,- շեշտեց քաղաքացիներից մեկը։
Մի քաղաքացի էլ շեշտեց՝ «Ամերիկան ուր մտնում է, կռիվ ու պատերազմ է բերում»։
Մանրամասները՝ տեսանյութում։
