Հայաստանում տարեկան գնաճը 2025 թվականի մայիսին նախորդ տարվա նկատմամբ կազմել է 4,3%, իսկ ապրիլի համեմատ՝ 3,2 %, ինչի մասին վկայում են վիճակագրական վարչության տվյալները:
Շուրջ 7%- ով աճել են պարենային ապրանքների գները, ոգելից խմիչքի և ծխախոտի գները՝ 5,8%-ով, նվազել են հագուստի և կոշիկի գները:
Մինչդեռ ներկայացնելով 2024-ի բյուջեի կատարողականը՝ ՀՀ վարչապետ Նիկոլ Փաշինյանն այն գնահատել էր որպես հուսահատությունից՝ երջանկության բյուջե:
Շեշտելով, որ իր ղեկավարման ընթացքում աշխատավարձի 75 տոկոս աճ է արձանագրվել՝ նա հայտարարել է, թե այս ամենը վկայությունն է նրա, որ «մարդիկ Հայաստանում ավելի լավ են ապրում»:
Armenia Today-ի նկարահանող խումբը Երևանի բնակիչներին հարցրել է, թե զգո՞ւմ են թանկացումները իրենց ամենօրյա առևտրի մեջ, ո՞ր ապրանքներն են թանկացել ու էժանացել՝ ըստ նրանց: Նաև հետաքրքրվել ենք՝ ավելի լավ ե՞ն ապրում:
Քաղաքացիների մեծամասնությունը պատասխանել է, որ ոչ մի գնիջեցում չկա, ավելին՝ նկատում են, որ օր օրի ամեն ինչ թանկանում է։
«Սնունդն է թանկացել, հացամթերքը, միրգ-բանջարեղենն ու հագուստը»,- ասել է նրանցից մեկը:
Մեկ այլ քաղաքացի էլ հավելել է, որ նախկինի հետ համեմատած՝ այս պահին շատ ավելի թանկ է ամեն ինչ։
«Մենակ խիղճն է էժանացել հիմա, ուրիշ ոչ մի բան»,- ասել է նա։
Հարցված քաղաքացիներից ոմանք, դժգոհելով անհիմն թանկացումներից, ասում էին, որ կարևոր խնդիրներից մեկն էլ այն է, որ աշխատավարձերի բարձրացում տեղի չի ունենում։
«Գոյատևում են, ոչ թե լավ են ապրում», – հավելել է մեկ այլ մասնակից:
Երևանցիներից ոմանք էլ պատասխանել են, որ համաձայն են վարչապետի հետ, և հիմա բոլորը լավ են ապրում։ «Իմ թոշակը եղել է 29 հազար, հիմա 44 հազար է, ինչքան ուզում է՝ թանկացում լինի, չի կարա նա նրան փակել։ 50% թոշակ է ավելացրել»,- ասել է քաղաքացիներից մեկը:
Մանրամասները՝ Armenia Today-ի տեսանյութում
