Ռուս-ուկրաինական ռազմական գործողությունների ֆոնին տնտեսագետներն արդեն հստակ տնտեսական հետևանքների մասին են մատնանշում: Ի թիվս այլ խնդիրների՝ Հայաստանի դեպքում խնդրահարույց է ցորենի հարցը, որի մեծ մասը ներկրվում է հենց Ռուսաստանից:
«Սպառողների ասոցիացիա» հ/կ Արմեն Պողոսյանն Armenia Today-ի հետ զրույցում անդրադարձել է խնդրին՝ դիտարկելով նաև Հայաստանում առկա իրավիճակը, որն այլ է 44-օրյա պատերազմից հետո: Խոսքը մասնավորապես այն փաստի մասին է, ըստ որի՝ Հայաստանը չունի հացահատիկի այն պաշարները, որն ուներ մինչ այդ: Գաղտնիք չէ, որ Ադրբեջանի կողմից օկուպացված շրջաններում կային հսկայական հողեր, որոնք ապահովում էին նաև մեր հացահատիկի պաշարները։
«Կա պարենային անվտանգության մասին օրենք: Այնտեղ ասվում է, որ պարենի պաշարները պետք է առնվազն 3 ամսվա լինեն: Այսինքն, ներմուծելուց կամ արտադրելուց որոշակի քանակ պետք է որպես պաշար պահվի, որպեսզի այն օգտագործվի արտակարգ իրավիճակներում, այդ թվում՝ պատերազմի ժամանակ»,-ասաց մեր զրուցակիցը՝ նշելով, որ պաշարների մասին տվյալներ չհայտնելը ճիշտ մոտեցում չէ:
«Մեզ մոտ ցորենի 60 տոկոսը ներմուծվում է Ռուսաստանից կամ մոտակա այլ երկրներից: Մեր երկիրն այդքան մեծ չէ, որ կարողանա այդ պաշարն ապահովել: Մանավանդ, երբ մենք բավականին տարածքներ կորցրինք Արցախում: Ու այս տեսանկյունից պաշարների առումով ցանկացած հարցադրում պետք է արձագանք ստանա, որին կհետևեն նաև հստակ քայլերը: Քանի որ ՌԴ-ի նկատմամբ պատժամիջոցներն ու առկա ընդհանուր իրավիճակն ազդելու են նաև ցորենի գնի վա, մեզ մոտ թանկացում է սպասվում: Այս առումով անելանելի իրավիճակ է: Մեր տնտեսական բլոկի ղեկավարները, կառավարությունը պետք է շուտ կողմնորոշվեն ու մտածեն ցորենի պաշարների մասին: Հատկապես պետք է ուշադրություն դարձնել գյուղմթերքի բաշխման վրա՝ աշնանը մեզ համար բարենապաստ բերք ստանալու տեսանկյունից: Մենք չենք կարող խնդիրն անտեսել ու ամեն ինչ ինքնահոսի թողել: Մեր ցորենի արտադրությունը 40 տոկոս է, 40 տոկոսը կարող է դառնալ 45, բայց 100 երբեք չի դառնա»,-ասաց Արմեն Պողոսյանը՝ շեշտելով օպերատիվ քայլերի անհրաժեշտության մասին:
Նրա խոսքով՝ ցորենի գնի բարձրացումն անխուսափելի է և այն, բնականաբար, ազդելու է նաև հացի գնի թանկացման վրա. «Իսկ հացի գնի թանկացումն իր հետևից կբերի մակարոնեղենի, թխվածքների, հացաբուլկեղենի շղթայական թանկացմանը: Սրանք այն ապրանքներն են, որոնք մեր բնակչության սպառողական զաբյուղում այս զգալի տոկոս են կազմում»:
Նա հիշեցրեց, որ կյանքը մեզ մոտ առանց այդ էլ ավելի է թանկացել, նաև վատթարացել. «Երկու ամսում հայտնի դարձավ միանգամից երեք ծառայության սակագների բարձրացման մասին: Խոսքը ջրի, էլեկտրաէներգիայի, առաջիկայում նաև գազի սակագնի բարձրացման մասին է: Իսկ հացի գնի հնարավոր թանկացումն էլ ավելի կխորացնի իրավիճակը»:
Արմեն Պողոսյանի դիտարկմամբ՝ անհրաժեշտ քայլերի շարքում կարող է լինել նաև հարևան այլ երկրների շուկաների ուսումնասիրությունը:
«Հարևան երկրներից շատերը ևս ցորենի պաշար ունեն: Պետք է ուսումնասիրել ու անհապաղ բանակցություններ սկսել: Այդկերպ հնարավոր է որոշ չափով կոնպենսացնել Ռուսաստանից ներմուծվող ցորենի պակասը: Մինչդեռ այս ամենը մասնագիտական աշխատանք է պահանջում, ինչը չեմ տեսնում կառավարության և ԱԺ տնտեսական հանձնաժողովում: Նաև ջախջախված տնտեսության պայմաններում կառավարությունում քննարկում են, թե աղամանը սրճարանում ինչպես և որտեղ պետք է դնել: Բացի այդ, գումար են ծախսում ծխախոտը ծածկելու համար: Բայց այս իրավիճակում պարենային անվտանգությունից կարևոր էլ ի՞նչ կարող է լինել: Իհարկե՝ միայն բանակը: Այլ կարևոր բան այս պահին չկա»,-եզրափակեց մեր զրուցակիցը:
