«Այլընտրանք չի թողնում». Հայկ Իգնատյանը կոչ է արել պաշտպանել Վեհարանը և Կաթողիկոսին՝ Փաշինյանի կողմից հնարավոր հարձակման դեպքում

Հայ Առաքելական Եկեղեցու (ՀԱԵ) Հոգևոր խորհրդի անդամ, «Տաշիր» ընկերությունների խմբի առաջին փոխնախագահ Հայկ Իգնատյանը կոչ է արել հայ քրիստոնյաներին և հավատավոր ժողովրդին կանգնել Մայր Աթոռի և Ամենայն Հայոց Կաթողիկոսի Գարեգին Բ-ի կողքին՝ ՀՀ իշխանությունների կողմից հնարավոր հարձակման դեպքում։

Իգնատյանը նշել է, որ դժվար է հավատալ, թե Էջմիածինը պատրաստվում են գրոհել «ոչ թե թուրք-սելջուկները», այլ մեր համաքաղաքացիները՝ որակելով Փաշինյանի այս հնարավոր քայլը «որպես հակազգային օրակարգի իրականացում»։

«Հայաստանի գործող վարչապետը, հավատարիմ մնալով իր հակաազգային օրակարգերն իրականցնելու մտադրությանը, հայտարարել է Մայր Աթոռի և Ամենայն Հայոց Կաթողիկոսի դեմ հարձակում կազմակերպելու մտադրության մասին։ Դժվար է բառեր գտնել այս երևույթը նկարագրելու համար։ Դժվար է նաև հավատալ, որ Էջմիածինը պատրաստվում են գրոհել ոչ թե մոնղոլ-թաթարները, թուրք-սելջուկները կամ օսմանները, այլ մեր իսկ ազգակիցները, մեր իսկ համաքաղաքացիները»,– հայտարարել է «Տաշիր» ընկերությունների խմբի առաջին փոխնախագահը։

Նա կոչ է արել հավատավոր ժողովրդին պաշտպանել սրբությունները, եթե վարչապետի սպառնալիքը դառնա իրականություն՝ շեշտելով, որ Փաշինյանը «որևէ այլընտրանք չի թողնում»։

«Հայաստանին ծանր փորձություն է սպասվում, սակայն վստահ եմ, որ միահամուռ ուժերով ու հավատքով հաղթահարելու ենք»,- եզարափակել է Իգնատյանը։

Այսօր ավելի վաղ Փաշինյանը Facebook-ում Ամենայն Հայոց կաթողիկոսից Վեհարանն ազատելու վերաբերյալ գրառում էր արել՝ կոչ անելով «պատրաստվել Մեծ հոգևոր հանդիպման՝ Էջմիածնի կենտրոնական հրապարակում»։

«Տաշիր» ընկերությունների խմբի առաջին փոխնախագահը հուլիսի 7-ին քննադատել էր Փաշինյանի գրառումը այն մասին, որ ուժայինները իրավունք ունեն գործողություններ կատարել Մայր Աթոռի տարածքում՝ նշելով, որ վարչապետը փորձում է իրավական տեսք հաղորդել արդեն իրականացված (օրինակ՝ եկեղեցին պաշտպանած Սամվել Կարապետյանի կալանավորումը) և նախատեսվող ապօրինություններին։

Մայիսի 29-ից սկսած՝ Փաշինյանը սոցիալական ցանցերում հայհոյանքներով լի մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով՝ կասկածի տակ դնելով նրա՝ կուսակրոնության ուխտի պահպանումը։ Փաշինյանը հուլիսի 8-ին հայտարարել էր, որ Մայր Աթոռ Սուրբ Էջմիածինը «զավթված է հակաքրիստոս, շնաբարո, ապազգային, ապապետական խմբակի կողմից»՝ հավելելով, որ պատրաստվում է Վեհարանի «ազատագրումն առաջնորդել անձամբ»։

Իրավապահ մարմինները հունիսի 25-ի և 27-ի խուզարկություններից հետո երկու ամսով կալանավորել էին Բագրատ արքեպիսկոպոս Գալստանյանին, Շիրակի թեմի առաջնորդ Միքայել արքեպիսկոպոս Աջապահյանին, ինչպես նաև շարժման 14 աջակցի։ Գալստանյանը և «Սրբազան պայքարի» աջակիցները մեղադրվում են պետական հեղաշրջման և ահաբեկչության նախապատրաստության փորձ կազմակերպելու մեջ։ Նրանցից ոչ ոք չի ընդունում մեղադրանքը:

Կարդացեք նաև՝