Բողոքի ակցիա դատախազության դիմաց՝ ի աջակցություն կալանավորված Արմեն Աշոտյանի (ուղիղ)

Հայաստանի հանրապետական կուսակցության ներկայացուցիչներն այսօր դատախազության դիմաց բողոքի ակցիա են իրականացրել՝ ի աջակցություն ՀՀԿ փոխնախագահ Արմեն Աշոտյանի։

ՀՀԿ-ական, ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը դատախազության դիմաց իր ելույթի ժամանակ նշեց, որ Արմեն Աշոտյանը քաղաքական դաշտի մարտիկներից է։

«Արմեն Աշոտյանը պայքար տվող տղա է։ Այստեղ հավաքված մարդիկ եկել են ասելու, որ պատրաստ են շարունակել այն քաղաքական գիծը, այն քաղաքական կուրսը, որն ունի Արմեն Աշոտյանը»,-հավելեց Աբրահամյանը։

ՀՀԿ-ական, ՀՀ ԱԺ «Պատիվ ունեմ» խմբակցության ղեկավար Հայկ մամիջանյանն ընդգծեց, որ իշխանութունները փորձում են ընդդիմադիրներին իրենց արշինով չափել։

«Մտածում են, որ իրենց բանտարկություններից, շինծու քրեական գործերից վախեցող կա։ Դու լավ չես հասկացել, թե ում հետ գործ ունես։ Արմեն Աշոտյանը, մեր մյուս ընկերները, ովքեր տարիներ շարունակ գտնվում են անազատության մեջ, ո՛չ քեզնից, ո՛չ էլ քո կատարածուներից չեն վախենում, որովհետև մենք ավելի թանկ բան ենք կորցրել ու կորցնում։ Ի տարբերություն քեզ՝ մեզ համար ազատ կյանքն առանց Արցախի արժեք չունի ,-իր խոսքն ուղղելով վարչապետ Նիկոլ Փաշինյանին՝ ասաց Մամիջանյանը։

«Ինչպես Ալիևին Ղարաբաղը պետք է առանց հայերի, Փաշինյանին էլ Հայաստանը պետք է առանց հայրենասերների։ Չի՛ ստացվելու, չես կարող բոլոր հայրենասերներին քաղբանտարկյալ սարքել»,-հավելեց Մամիջանյանը։

Հունիսի 15-ին Քննչական կոմիտեն հայտնել է նախկին իշխող ​​կուսակցության (ՀՀԿ) փոխնախագահ Արմեն Աշոտյանի կալանավորման պատճառների մասին։

Հակակոռուպցիոն դատարանի որոշմամբ հունիսի 16-ին Աշոտյանը երկու ամսով կալանավորվել է։

Նշենք, որ դեռ 2022 թվականի նոյեմբերին Աշոտյանին արդեն մեղադրանք էր առաջադրվել պաշտոնեական լիազորությունները չարաշահելու և փողերի լվացման համար՝ Երևանի պետական ​​բժշկական համալսարանի համար անշարժ գույք ձեռք բերելու գործով, որում նախկինում մեղադրանք էր առաջադրվել նաև ԵՊԲՀ նախկին ռեկտոր Միխայիլ Նարիմանյանին։ Նրա նկատմամբ որպես խափանման միջոց էր ընտրվել չհեռանալու մասին ստորագրությունը։