ՀՀ պաշտպանության նախարարությունն անդրադարձել է ապրիլի 8-ին ՀՀ գլխավոր դատախազ Աննա Վարդապետյանի՝ ՊՆ Վազգեն Սարգսյանի անվան ռազմական ակադեմիա ակադեմիա այցից հետո հրապարակված տեսանյութի մեկնաբնություններին՝ կապված «զինծառայողների խոնարհվելու վերաբերյալ»: Գերատեսչությունից նման պնդումները որակել են «կեղծիք»:
Տեսանյութում երևում է, որ կուրսանտները նախ կանգնում են ոտքի, ապա մի մասը փորձում է նստել, մյուս մասը՝ նստում։ «Ազա՛տ,նստե՛լ» հրահանգից հետո նստած կուրսանտները կրկին կանգնում են, իսկ մյուսները գլուխ մի պահ իջեցնում և ողջունում են Վարդապետյանին։
Ըստ նախարարության՝ դատախազի և ակադեմիայի պետի դահլիճ մուտքից անմիջապես հետո ակադեմիայի պետը կանգնած զինանձնակազմին տվել է «Ազա՛տ, նստե՛լ» հրահանգը:
«Նշված հրահանգից հետո, երբ զինանձնակազմը նստելիս է եղել, գլխավոր դատախազը ողջունել է կուրսանտներին, վերջիններս ուղղվել են, ողջունել հանրապետության գլխավոր դատախազին և հետո զբաղեցրել իրենց տեղերը», – ասվում է նախարարության հաղորդագրությունում:
Պաշտպանության նախարարությունը կոչ է արել կուրսանտների՝ ՀՀ բանակի ապագա սպաների շուրջ «կեղծ խոսակցություններ չտարածել»:
Դատախազության մամուլի քարտուղար Լուսինե Մարտիրոսյանը նախօրեին տեղեկացրել էր, որ կուրսանտներն ուղղել են նստարանը, ապա ողջունել Վարդապետյանին և կրկին նստարանն իջեցնելով՝ նստել։ Այս դրվագը մեկնաբանվել է, ըստ նրա, թե զինվորները խոնարհվում են ողջունելիս։
«Իրականությունն այլ է, ինչն ակնհայտ պարզ է դառնում տեսանյութն ամբողջությամբ դիտելուց։ Խնդրում եմ չտրվել մանիպուլյացիաներին և զերծ մնալ դիտավորյալ խեղաթյուրված տեղեկատվության տարածումից»,- նշել էր նա։
Տեսանյութում երևում է, որ կուրսանտները նախ կանգնում են ոտքի, ապա մի մասը փորձում է նստել, մյուս մասը՝ նստում։ «Ազա՛տ,նստե՛լ» հրահանգից հետո նստած կուրսանտները կրկին կանգնում են, իսկ մյուսները գլուխը մի պահ իջեցնում և ողջունում են Վարդապետյանին։
