Երեկ՝ ժամը 12:30-ին, մեր դիրքերից մեկին մոտենում է «ՈՒԱԶ» ավտոմեքենա և անհասկանալի պատճառով զինծառայողները դուրս են գալիս մեքենայից և շարժվում մեր դիրք, որը գտնվում է անմիջապես ՀՀ տարածքում։ Այս մասին այսօր՝ հուլիսի 13-ին, կառավարության արտահերթ նիստում ասաց ՀՀ պաշտպանության նախարար Դավիթ Տոնոյանը:
«Քանի որ շարժումն անսպասելի էր մեր զինծառայողների համար, զինծառայողները վերադասին զեկուցելիս ստանում են հրահանգ՝ հաշվի առնելով ադրբեջանական զինծառայողների հնարավոր մոլորվածությունը, աշխարհագրությունը կամ օպերատիվ իրավիճակին չտիրապետելը՝ կոչ են արել լքել տարածքը, որը իրականացվել է ադրբեջանի զինծառայողների կողմից՝ թողնելով ավտոմեքենան: Հետո սկսվում է 82 մմ ականանետերով հրետակոծություն դեպի նույն դիրքը, ինչպես նաև մարտական խմբերի շարժ, որը կասեցվել է հրետակոծությամբ և համապատասխան գործողություններով: Հակառակորդը կրելով կորուստներ՝ նահանջել է», – ասաց նախարարը:
Տոնոյանը զեկուցեց, որ մինչ այժմ նույն սցենարով տարբեր տրամաչափի հրետանու օգտագործմամբ 15-25 րոպեն մեկ հրետակոծությունը վերսկսվում է, և որի դադարը եղել է գիշերը՝ 03:30-ից մինչև 05:30-ը:
Նախարարը վստահեցրեց՝ բոլոր հրետակոծությունները թիրախավորվում են դիպուկահար կրակով, որի արդյունքում հակառակորդը ունի զգալի կորուստներ:
«Օպերատիվ իրավիճակը ամբողջովին վերահսկվում է, ու կառավարելի է», – ասաց ՀՀ պաշտպանության նախարարը։
