ՀՀ կառավարությունը լիազորություն կստանա պետական սեփականություն հանդիսացող ռազմական նշանակության արտադրանքը տրամադրել ռազմարդյունաբերական համալիրի սուբյեկտներին։ «Ռազմարդյունաբերական համալիրի մասին» օրենքում լրացում կատարելու մասին» նախագիծն առաջին ընթերցմամբ քննարկվել է մայիսի 15-ին կայացած արտահերթ նիստի ժամանակ:
Ըստ օրենքի նախագծի՝ արտադրանքի տրամադրման նպատակը նոր արտադրատեսակների մշակումը, արդիականացումը, նորոգումը կամ փորձարկումն է։
Հիմնական զեկուցող, ՔՊ պատգամավոր Տրդատ Սարգսյանը նշել է, որ նախագիծը միտված է բարելավելու ռազմարդյունաբերության ոլորտում պետական ռեսուրսների առավել արդյունավետ ու նպատակային կառավարումը:
«Այն իր բնույթով տեխնիկապես պարզ, սակայն ռազմավարական առումով առանցքային կարևորություն ունի մեր պետության պաշտպանական և տեխնոլոգիական ապագայի տեսանկյունից»,- շեշտել է նա։
Ըստ պատգամավորի՝ ՀՀ-ն կանգնած է անվտանգային մարտահրավերների առջև, հետևաբար՝ ռազմաարդյունաբերական կարողությունների զարգացումն ու ինքնաբավության բարձրացումը խիստ անհրաժեշտ են:
Պատգամավորի դիտարկմամբ՝ նախագծի ընդունումն ակնկալում է տեղական արտադրողների տեխնոլոգիական ազատության ընդլայնում, նորարարության խթանում:
Հարակից զեկուցող, ԲՏԱ նախարար Մխիթար Հայրապետյանն, իր հերթին, նշել է, որ մայիս ամսին նախատեսվել էր տարատեսակ զինատեսակներ, ռազմամթերք և լրամասեր փոխանցել մեկ տասնյակից ավելի ռազմարդյունաբերական ընկերությունների՝ նոր զինատեսակների արտադրության և դրանց պետական փորձարկման, հիմնանորոգման, արդիականացման աշխատանքների և օգտահանման նպատակով: Նա նշել է, որ կառավարությանը համապատասխան ռազմամթերքը, զենքերը կտրամադրի ընկերություններին։
Նախագծի համահեղինակ, ԱԺ ՔՊ պատգամավոր Արմեն Խաչատրյանը պարզաբանել է, որ նախագիծը հրատապության ռեժիմով և արտահերթ նիստում քննարկելու անհրաժեշտությունը բխում է ռազմական արդյունաբերության նկատմամբ իշխանությունների վերաբերմունքով։
«Այս պահի դրությամբ՝ կան ձեռնարկություններ, որոնք գտնվում են կառավարության ցանկի մեջ, կարիք ունեն որոշակի ռազմական նշանակության ապրանքների ստացման։ Հրատապության ռեժիմը ցույց է տալիս նաև մեր վերաբերմունքը ռազմաարդյունաբերական համալիրի նկատմամբ, սրանով մենք շատ ենք կարևորում, որ ռազմաարդյունաբերության զարգացումը մեր երկրի ռազմավարական կարողություններից մեկն է»,- շեշտել է Խաչատրյանը։
56 կողմ, 0 դեմ, 2 ձեռնպահ ձայներով ԱԺ-ն երկրորդ ընթերցմամբ և ամբողջությամբ ընդունել է կառավարությանը ռազմարդյունաբերական համալիրի սուբյեկտներին ռազմական արտադրանք տրամադրելու լիազորություններ տալու նախագիծը։
