Ռուս խաղաղապահները պետք է ամեն ինչ անեին, որպեսզի Արցախի ռազմաքաղաքական ղեկավարությունը չգերեվարվեր 2023 թվականի սեպտեմբերին, ասել է ՀՀ Ազգային ժողովի պաշտպանության և անվտանգության հանձնաժողովի նախագահ Անդրանիկ Քոչարյանը։
Նա այս մասին հայտարարել է «Եռաբլուր» զինվորական պանթեոնում, որտեղ Վազգեն Սարգսյանի ծննդյան օրվա առթիվ հավաքվել էին քաղաքական և հասարակական գործիչներ։
«Չէ, գերի պետք է չընկնել, այն էլ այդպիսի մակարդակի ղեկավարությանը, Բաքվի դատավարության ընթացքում դա օգտագործվելու է Հայաստանի դեմ»,- ասել է Քոչարյանը։
Պատգամավորը մեկնաբանել է լրագրողների այն նկատառումը, թե վարչապետ Նիկոլ Փաշինյանի «բանակը չսրբադասելու» կոչն ուղղակիորեն հակադրվում է զինված ուժերն ամեն ինչից վեր դասած Վազգեն Սարգսյանի քաղաքականությանը։ Քոչարյանը կոչ է արել չքաղաքականացնել Սարգսյանի ծննդյան տարեդարձը։
«Պետք է սիրենք երկիրն ու ամեն ինչ անենք, որ այն դառնա անվտանգ ու ապահով, և դա է Վազգեն Սարգսյանի պատգամը»,- հավելել է նա։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում՝ Արցախի առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին Բաքվում սկսվել էին Արցախի 8 քաղաքական և ռազմական առաջնորդների դատավարությունները:
Գործով անցնում են 2023-ին գերեվարված Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, նախկին պետնախարար Ռուբեն Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
Փետրվարի 19-ին Վարդանյանը երկրորդ անգամ հացադուլ էր հայտարարել։ Փետրվարի 26-ին Վարդանյանի փաստաբան Ջարեդ Գենսերը հայտնել էր նրա առողջական վիճակի կտրուկ վատթարացման մասին։ Փետրվարի 27-ին նրա որդին՝ Դավիթ Վարդանյանը, միջազգային հանրությանը, աշխարհասփյուռ հայությանը կոչ էր արել քայլեր ձեռնարկել Բաքվի դեմ, որտեղ Վարդանյանը խոշտանգումների է ենթարկվում։
