Թեհրանում Թուրքիայի դեսպան Հիջաբի Քիրլանգիչը կանչվել է Իրանի ԱԳՆ՝ Թուրքիայի արտգործնախարար Հաքան Ֆիդանի հայտարարությունների պատճառով, հայտնում է Reuters-ը։
Ավելի վաղ Ֆիդանը հայտարարել էր, որ Իրանի արտաքին քաղաքականությունը, որը հենվում է տարածաշրջանի աշխարհազորայինների վրա, «վտանգավոր է» և պետք է փոխվի:
«Եթե դուք փորձում եք անհանգստություն հրահրել երրորդ երկրում, ապա այլ երկրները ևս կարող են ձեզ անհանգստացնել՝ աջակցելով ձեր սեփական երկրում գտնվող խմբերին»,- հավելել է նա:
Իրանի արտաքին գործերի նախարարության Միջերկրական և Արևելյան Եվրոպայի հարցերով գլխավոր տնօրեն Մահմուդ Հեյդարին դեսպանին հայտնել է, որ «երկու երկրների ընդհանուր շահերը և տարածաշրջանային պայմանների զգայունությունը պահանջում են խուսափել սխալ մեկնաբանություններից և անիրատեսական վերլուծություններից, որոնք կարող են հանգեցնել երկկողմ հարաբերություններում տարաձայնությունների և լարվածության»։
Բացի այդ, Իրանի արտաքին գործերի նախարարության ներկայացուցիչ Էսմայիլ Բաղային հայտարարել է, որ Թեհրանն ու Անկարան որոշ հարցերի շուրջ ունեն կարծիքների տարաձայնություններ։ Նշելով, որ Իրանը բարձր է գնահատում Թուրքիայի հետ իր հարաբերությունները, դիվանագետն ասել է, որ «ցավոք, այն խոսքերը, որոնք բազմիցս լսել են, չափազանց ապակառուցողական են»։
«Մեր թուրք ընկերները, հավանաբար, պետք է ավելի շատ մտածեն Սիրիայում և տարածաշրջանում սիոնիստական ռեժիմի քաղաքականության մասին»,- հավելել է Իրանի ԱԳՆ ներկայացուցիչը։
Դրանից հետո Թուրքիայի արտաքին գործերի նախարարությունը կանչել է Անկարայում Իրանի գործերի ժամանակավոր հավատարմատարին։ Թուրքիայի արտգործնախարարության խոսնակ Օնջու Քեչելին հայտարարել է, որ իրանցի պաշտոնյաները վերջին ժամանակներս ավելի ու ավելի են հրապարակայնորեն քննադատում Թուրքիային։
«Արտաքին քաղաքականության խնդիրները ոչ մի դեպքում չպետք է օգտագործվեն որպես ներքին քաղաքականության գործիք։ Այս համատեքստում մենք նախընտրում ենք քննադատական ուղերձներ փոխանցել ուղղակիորեն մյուս երկրին։ Մենք այսօր գնացել ենք այս ճանապարհով»,- ասել է նա՝ նշելով, որ Թուրքիան «մեծ նշանակություն է տալիս» Իրանի հետ հարաբերություններին։
