Հայաստանի էկոնոմիկայի նախարար Գևորգ Պապոյանը հայտարարել է, որ ՀՀ կառավարությունը ԵԱՏՄ-ից դուրս գալու օրակարգ չունի։
«Ներկայումս Հայաստանը ԵԱՏՄ անդամ է։ Եվ հիմա ԵԱՏՄ-ից դուրս գալու հարց ՀՀ կառավարության օրակարգում չկա։ ԵՄ-ին անդամակցության գործընթացը զուգահեռ օրակարգ է, և մեր խնդիրը ոչ թե այդ օրակարգերը քննարկելն է, այլ մեր երկրի տնտեսության դիմակայունությունը բարձրացնելը»,- 2024 թվականի արդյունքների մասին ասուլիսում նշել է Պապոյանը։
Նախարարը համոզմունք է հայտնել, որ այնքան էլ էական չէ՝ Հայաստանը ԵՄ մա՞ս է, թե՞ ԵԱՏՄ։ Գլխավորը նրա կարծիքով այն է, որ երկրի տնտեսության արտադրողականությունն աճի, բարձր և մրցունակ ծառայություններ մատուցի։
«Մեր արտադրանքը պետք է լինի ամենամրցունակը, որտեղ էլ որ լինի։ Ըստ այդմ՝ մեզ հարկավոր է արտադրողականության բարձրացում, ինչի համար հարկավոր են որակյալ մասնագետներ, սարքավորումներ, տեխնոլոգիաներ, ստանդարտներ, լաբորատորիաներ և այլն»,- շեշտել է նա։
Կառավարությունը հունվարի 9-ի նիստում հավանություն էր տվել ՀՀ-ի՝ Եվրոպական Միությանն անդամակցելու գործընթացի մեկնարկի վերաբերյալ նախագծին։ ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։
Նույն օրը Կրեմլը մեկնաբանել էր ՀՀ կառավարության այս որոշումը։ ՌԴ նախագահի մամուլի քարտուղար Դմիտրի Պեսկովը նշել էր, որ Հայաստանը չի կարող միաժամանակ լինել ԵՄ և ԵԱՏՄ անդամ։ ՌԴ փոխվարչապետ Ալեքսեյ Օվերչուկն, իր հերթին, հայտարարել էր, որ Մոսկվան ԵՄ անդամակցության նախագծի քննարկումը դիտարկում է որպես ԵԱՏՄ-ից Հայաստանի դուրս գալու սկիզբ։ ՌԴ Պետդումայի պատգամավոր, ԱՊՀ հարցերով հանձնաժողովի փոխնախագահ Կոնստանտին Զատուլինը «դավաճանություն» էր անվանել ՀՀ կառավարության որոշումը՝ աջակցելու ԵՄ-ին անդամակցության մեկնարկի մասին օրինագծին։
Հունվարի 11-ին Եվրոպական միության արտաքին ծառայության խոսնակ Անիտա Հիպերը հայտարարել էր, որ Եվրահանձնաժողովը մտադիր է ուսումնասիրել Հայաստանի օրենսդրական նախաձեռնությունը՝ սկսելու հանրապետության Եվրամիությանն անդամակցելու գործընթացը, ինչպես նաև նախատեսում է այն քննարկել Երևանի հետ։
