Վարչապետի մամուլի քարտուղար Նազելի Բաղդասարյանը հայտնել է, որ ժամը 14:00-ի դրությամբ Լեռնային Ղարաբաղից բռնի տեղահանված 100 437 անձ է ժամանել Հայաստան։
«Հակարիի կամուրջը հատել է 21 062 տրանսպորտային միջոց, հաշվառված անձանց թիվը կազմում է 82 827: Ժամը 14:00-ի դրությամբ 34 607 անձ օգտվել է պետության կողմից առաջարկված կեցավայրերից, որոնց բաշխվածությունը ըստ մարզերի հետևյալն է՝ Արագածոտնի մարզ 1878, Արարատի մարզ՝ 8194, Արմավիրի մարզ՝ 3104, Գեղարքունիքի մարզ՝ 3009, Լոռու մարզ՝ 1626, Կոտայքի մարզ՝ 9490, Շիրակի մարզ՝ 1391, Սյունիքի մարզ՝ 2273, Վայոց Ձոր՝ 1740, Տավուշի մարզ՝ 1902»,- ասել է նա:
Նազելի Բաղդասարյանը նշել է, որ կեսգիշերից հետո, Լեռնային Ղարաբաղից բռնի տեղահանված անձանց մուտքը զգալիորեն նվազել է:
Վարչապետի մամուլի քարտուղարը նաև տեղեկացրել է Շտապ օգնության 13 մեքենաները, որոնք մեկնել էին Ստեփանակերտ՝ տեղափոխելու հենաշարժողական խնդիրներ ունեցող անձանց և անկողնային հիվանդներին, արդեն իսկ ճանապարհ են ընկել դեպի Գորիս:
Արմավիրի մարզպետ Էդվարդ Հովհաննիսյանը նշել է, որ արդեն 15:00-ի դրությամբ մարզում հաշվառված և կեցավայրերով ապահովված է 863 ընտանիք՝ 3549 անձ: Ըստ համայնքների բաշխվածությունը հետևյալն է՝ Վաղարշապատում 276 ընտանիք՝ 1167 անձ, Մեծամորում 174 ընտանիք՝ 680 անձ, Արմավիրում 117 ընտանիք՝ 492 անձ, Արաքսում 96 ընտանիք՝ 366 անձ, Խոյում 113 ընտանիք՝ 483 անձ, Փարաքարում 59 ընտանիք՝ 233 անձ, Բաղրամյանում 28 ընտանիք՝ 128 անձ:
Գեղարքունիքի մարզպետ Կարեն Սարգսյանի ներկայացմամբ, ժամը 15:00-ի դրությամբ 3276 անձ է հաշվառվել և կեցավայրերով ապահովվել մարզում: Բաշխվածությունն ըստ համայնքների հետևյալն է՝ Սևանում 1167 անձ՝ 242 ընտանիք, Գավառում 322 անձ՝ 72 ընտանիք, Մարտունիում 746 անձ՝ 220 ընտանիք, Վարդենիսում 565 անձ՝ 165 ընտանիք, Ճամբարակում 374 անձ՝ 103 ընտանիք: Գեղարքունիքի մարզպետը նշել է, որ տեղահանված անձանց աշխատանքով ապահովելու ուղղությամբ էլ են քայլեր իրականացվում:
Արմավիրի մարզպետը նշել է, որ արդեն բաժանվել են երկշաբաթյա չափաքանակով սնունդ այն քաղաքացիներին, ովքեր ունեն կեցավայր: Մարզպետը նաև նշել է, որ այս պահի դրությամբ 33 ընտանիքի երեխա արդեն հաճախում է դպրոց:
Նազելի Բաղդասարյանը հավելել է, որ աշխատանքներ են տարվում, որպեսզի արդեն հաջորդ շաբաթ մեկնարկի 100 հազար դրամ միանվագ աջակցության փոխանցումը:
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»: Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, որի պայմաններն էին՝ հայկական զինված կազմավորումները վայր են դնում զենքերը, լքում մարտական դիրքերն ու ամբողջությամբ զինաթափվում, հանձնվում է ողջ սպառազինությունն ու ծանր տեխնիկան։
Պայմանավորվածության համաձայն՝ սեպտեմբերի 21-ին Եվլախում տեղի էր ունեցել Արցախի և Ադրբեջանի ներկայացուցիչների հանդիպումը։ Ստեփանակերտը հայտնել էր, որ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
Սեպտեմբերի 28-ին Արցախի նախագահ Սամվել Շահրամանյանը ԱՀ պետական համակարգը լուծարելու հրամանագիր է ստորագրել, որով Արցախի Հանրապետությունը դադարում է գոյություն ունենալ։
