Ջոն Քենեդիի եղբորորդին ԱՄՆ նախագահական ընտրություններին մասնակցելու հայտ է ներկայացրել

ԱՄՆ 35-րդ նախագահ Ջոն Քենեդու եղբորորդին՝ Ռոբերտ Քենեդի կրտսերը, հայտ է ներկայացրել 2024 թվականին կայանալիք ԱՄՆ նախագահական ընտրություններին մասնակցելու համար, հայտնում է CNN-ը։

«Բնապահպան իրավաբան և հակապատվաստումային ակտիվիստ Ռոբերտ Քենեդի կրտսերը փաստաթղթեր է ներկայացրել Դաշնային ընտրական հանձնաժողով՝ 2024 թվականին Դեմոկրատական ​​կուսակցությունից նախագահի թեկնածու առաջադրվելու համար»,- ասվում է զեկույցում:

Հեռուստաալիքի տվյալներով՝ 69-ամյա Քենեդի կրտսերը Նյու Յորքի նախկին սենատոր, ԱՄՆ գլխավոր դատախազ Ռոբերտ Քենեդիի և 35-րդ նախագահ Ջոն Քենեդու եղբորորդին է։

CNN-ը հիշեցնում է, որ Քենեդին թերահավատորեն է վերաբերվում պատվաստմանը։ Նա դեմ է արտահայտվել կորոնավիրուսային պատվաստանյութին և քննադատել է դաշնային կառավարության՝ COVID-19 համաճարակի դեմ պատվաստանյութերով պայքարելու գործողությունները:

Քենեդին նախագահի պաշտոնի համար գրանցված դեմոկրատ թեկնածուներից երկրորդն է։ Ավելի վաղ գրող Մարիան Ուիլյամսոնը մեկնարկել է Դեմոկրատական ​​կուսակցությունից առաջադրվելու իր քարոզարշավը:

Սպիտակ տան ներկայիս ղեկավար Ջո Բայդենը դեռ պաշտոնապես չի հայտարարել նախագահական ընտրություններին մասնակցելու մասին։