Միջազգայնագետ Սուրեն Սարգսյանն իր Facebook-յան էջում տեղեկություններ է հաղորդել ՀՀ-ում ԱՄՆ-ի նոր դեսպանի թեկնածուի մասին։
Ըստ Սարգսյանի՝ շատ է քննարկվում այն հարցը, որ նա նախկինում ծառայել է Ուկրաինայում: «Ես այստեղ խնդիր չեմ տեսնում: Հայաստանում ԱՄՆ նախկին դեսպան Յովանովիչն էլ հետագայում գործուղվեց Ուկրաինա: Լին Թրեյսին էլ մինչ Հայաստան գալը ծառայում էր Պակիստանում: Չեմ կարծում, որ սրանք հանգամանքներ են, որոնց վրա պետք է դավադրությունների տեսություններ կառուցել»,- նշել է փորձագետը։
Ըստ Սարգսյանի՝ մասնավոր զրույցներից Քրիստինա Քվինի մասին իրեն մանրամասներ են հայտնի դարձել։ «Դեսպանի թեկնածու Քրիստինա Քվինը լուրջ ճանապարհ անցած, պատրաստված, ծանրակշիռ և պրոֆեսիոնալ դիվանագետ է (ի համեմատություն Վաշինգտոնում մեր դեսպանի), ով ծառայել է Պետդեպում (Եվրոպական ուղղությամբ), ԱԽ-ում և մի շարք օտարերկրա պետություններում: Նա հետսառըպատերազմյան սերնդի դիվանագետներից է, փայլուն պատկերացում ունի տարածաշրջանի և դրա պատմության մասին: Ծնունդով հայաշատ Ֆրեզնոյից է: Լուրջ կրթություն է ստացել «Occidental College»-ում (այստեղ նաև Օբաման է ուսանել) և ԱՄՆ բանակի Ռազմական Քոլեջում»,- նշել է Սարգսյանը։
Նա հայտնել է նաև, որ ամենայն հավանականությամբ, նա Երևան կժամանի սեպտեմբեր-հոկտեմբեր ամիսներին Սենատում թեկնածության հաստատումից հետո:
«ԱՄՆ-ն անլուրջ մարդկանց դեսպան չի ուղարկում»,- հետգրության մեջ նշել է Սարգսյանը։
