Հայկ Մարությանն առաջարկում է հերքել կեղծ պնդումները կամ փաստեր ներկայացնել: Այս մասին իր ֆեյսբուքյան էջում գրառում է կատարել Երևանի քաղաքապետարանի մամուլի քարտուղար Հակոբ Կարապետյանը:
Նա մասնավորապես նշել է, որ խոսքը Էդմոն Մարուքյանի և Դավիթ Խաժակյանի հայտարարությունների մասին է:
Նշենք, որ 2019-ի դեկտեմբերի 4-ին ԱԺ պատգամավոր, «Լուսավոր Հայաստան» խմբակցության ղեկավար Էդմոն Մարուքյանը 1in.am-ի եթերից ասել է, որ նվիրատու ընկերությունները իրե՛նք չեն գնել Կամազները, «Փո՛ղն են տվել քաղաքապետարանին, քաղաքապետարանն է գնել, փո՛ղ, փո՛ղ են տվել քաղաքապետարանին…
«Իսկ ի՞նչ իմանանք՝ ինչքան են տվել, ինչքանից են առել: Կարող ա, ասենք, 1 միլիոն դոլար տվել են, 800 հազարի են առել Կամազները»,-ասել է Մարուքյանը:
Գրեթե նույնաբովանդակ հայտարարություն «Ազատություն» ռադիոկայանի եթերում դեկտեմբերի 23-ին արել է Երևանի ավագանու «Լույս» խմբակցության ղեկավար Դավիթ Խաժակյանը:
Ըստ Հակոբ Արշակյանի՝ երկու գործիչները իրենց խոսքերը հաստատող որևէ փաստ չեն ներկայացրել և սրա պատճառն այն է, որ «Չէին էլ կարող ներկայացնել, որովհետեւ վերը նշված հայտարարությունները, ըստ էության ապատեղեկատվություն են»:
Քաղաքապետարանի մամուլի քարտուղարը նաև հավելում է, որ Հայկ Մարությանն այսօր պաշտոնական նամակներ է հղել Էդմոն Մարուքյանին և Դավիթ Խաժակյանին՝ առաջարկելով հերքել հիշատակված պնդումները կամ ներկայացնել համապատասխան փաստաթղթային հիմնավորումներ:
Հիշեցնենք, որ 2019-ի դեկտեմբերին լուրեր տարածվեցին, որ գործարար Սամվել Ալեքսանյանը Երևանի քաղաքապետարանին «Կամազներ» է նվիրել։
